ப்ளீஸ் சார்.....

கமல்ஹாசன் மர்மயோகி என்று ஆறாம் நூற்றாண்டைப் (திருத்தம் சொன்ன ஜிக்கு ஆயிரம் கோடி நன்றிகள்) பின்னணியாகக் கொண்ட படத்தை எடுக்கப்போவதுப் பற்றி எல்லோருக்கும் தெரிந்திருக்கும். படத்தை நல்லபடியாக எடுத்து, தயாரிப்பளர் தலையில் துண்டு விழாமலும், என் போலல்லாத ரசிகர்களையும் கமல் ஏமாற்றமாட்டார் என்றே நம்புவோம். ஆனால், கமல் இப்படியொரு கதையைப் படமாக எடுக்கப்போகிறார் என்றவுடன், எனக்கு சற்றே ஏம்மாற்றமாக இருந்தது.

தமிழார்வலர்கள் நிறைய பேர் படிக்க மறக்காத காவியம் அமரர் கல்கி எழுதிய பொன்னியின் செல்வன். தமிழ் நாவல் மீது எனக்கு ஓர் ஈர்ப்பு ஏற்படித்திய ஒன்று (அய்ய தோடா அப்படியே இவரு பெரிய சுஜாதாவாகிட்டாரு). வலைப்பாதிவாளர்கள் நிறைய பேரது ஃபேவரிட் புத்தகங்களில் பொன்னியின் செல்வன் மறக்காமல் இடம் பெற்றிருக்கிறது. கமல்ஹாசனும் "பொன்னியின் செல்வனைப் படித்திருக்கிறேன்" என்று பேட்டியில் சொன்னதாக ஞாபகம். அப்படியிருக்க இந்தக் காவியத்தை, ஏன் இது வரை எவரும் படமாக எடுக்க முன் வரவில்லை.

பொன்னியின் செல்வனில் இல்லாத கதையா? அதில் இல்லாத சூழ்ச்சியா? அதில் இல்லாத ராஜ தந்திரமா? அதில் இல்லாத காதலா? அதில் இல்லாத சோகமா? பாட்டுக்களுக்கூட பஞ்சமில்லாமல் கல்கியே நிறைய பாட்டு எழுதிக்கொடுத்து விட்டுப் போயிருக்கிறாரே. ஓர் படமெடுக்க என்னென்ன அம்சங்கள் வேண்டுமோ அத்தனையும் நிரம்பியிருக்கிறது. அப்படியிருக்க கமல்ஹாசனோ, மணிரத்னமோ ஏன் அதை படமாக்க முன் வரவில்லை என்று தெரியவில்லை.

எம்.ஜி.ஆர் தயவில் பொன்னியின் செல்வனை பொதுவுடமை ஆகி விட்டது. அதனால் அதன் மீது யாரும் உரிமை கொண்டாடவும் முடியாது.

உலகத்தரம் உலகத்தரம் என்று அடித்துகொள்கிறார்களே ஒரு ராஜா காலத்துக் கதையை உலகத்தரத்தில் வழங்க முடியாதா? ஓர் ராஜா காலத்துக் கதையைக் கொண்ட பென்ஹர் தானே இன்று வரை நிறைய ஆஸ்கர் வென்ற படமாக இருக்கிறது. Lord of the Rings ஓர் ராஜா காலத்து விட்டலாச்சாரியார் படம் தானே. Gladiator'உம் ராஜா காலத்து படம் தானே? இவையெல்லாம் வெற்றி பெற வில்லையா? அட, தசாவதாரத்திலேயே கூட முதல் 15 நிமிடங்கள் தான் நன்றாக இருக்கிறது, என்று எல்லோரும் சொல்லவில்லையா? இப்படி ஊக்கமூட்டும் நிறைய சாட்சிகளிருந்தும், பொன்னியின் செல்வனை யாரும் கண்டு கொள்ளவில்லையே என்று மனம் ஆதங்கப் படுகிறது.

சரி இந்தப் படத்தை ஏன் நான் கமல்ஹாசனோ மணிரத்னமோ எடுக்க வேண்டும் என்று சொல்கிறேன். பொன்னியின் செல்வன் என்பது ஏதோ ஓர் சாதாரண கதையல்ல. பலதரப்பட்ட புனைக்கதைகளை அதனுள் அடக்கி வைத்திருக்கிறது. சோழர்களின் உன்னதமான காலத்தைகுறிக்கும் பொன்னியின் செல்வன் மிகப் பிரம்மாண்டமான முறையில் திரை வடிவில் வழங்கப் பட வேண்டும். உதாரணத்திற்கு, முதல் காட்சியிலேயே பழுவேட்டறையரின் அணிவகுப்பைக் காட்டவேண்டுமானால், அதற்கு ஏற்றார் போல் தொழில் நுட்பத்தை பயன் படுத்த வேண்டும். அதற்கேற்றார் போல் காட்சி வடிவமைப்பது கமலையும் மணி ரத்னத்தையும் தவிற வேறெவரால் முடியும் என்று தெரியவில்லை? (ஷங்கரையும் சேர்த்துக்கொள்ளலாம்) ஒப்பனையிலும் மிக நுட்பமான நுணுக்கங்கள் தேவை.

சோழர் காலத்து மாளிகைகளையும், ஈழத்துப் போரையும், வந்தியதேவனும் அருள் மொழி வர்மனும் புயலில் சிக்கிக் கொள்ளும் காட்சி, கடற்கொள்ளையரிடமிருந்து வந்தியத்தேவன் தப்பிக்கும் காட்சி, நாகை புயல்(இது கூட சுனாமி தானோ, கல்கி கடல் பொங்கிற்று என்று எழுதியிருந்ததாக ஞாபகம்), மற்றும் வெள்ளம், இவையனைத்தும் தொழில் நுட்பத்திற்கே சவால் விடும் காட்சிகள். ஏதாவது கத்துக்குட்டி இயக்குனர், ஆர்வ மிகுதியில் இக்கதையை படமாக்குகிறேன் பேர்வழி என்று கெடுப்பதற்குள், திரைத்துறையில் கோலோச்சும் கமல் மணி ரத்னம், ஷங்கர் இவர்களில் யாராவது இக்கதையை படமாக்கினால் நல்லது. பொன்னியின் செல்வனை இன்னும் அதைப் படிக்காத மக்களுக்கு, அதை எடுத்து செல்ல இது அற்புதமான வழி.

அப்படி பொன்னியின் செல்வனைத் திரைப்படமாக எடுக்கும் பட்சத்தில், எந்தெந்த கதாபத்திரத்துக்கு யாரைப் போடலாம்? என் பதிவைப் படிப்பவர்கள் அதையும் சொன்னால் நல்லதாக இருக்கும்.

என்னைக்கவர்ந்த சில கதாபாத்திரங்களுக்குஇது தான் என் சாய்ஸ்:

வந்தியத்தேவன் : சூர்யா
குந்தவை : சிம்ரன்
அருள் மொழி வர்மன் : விக்ரம்
வானதி : அசின்
ஆதித்த கரிகாலன் : மாதவன்

நந்தினி : ஜோதிகா
ஆழ்வார்க்கடியான் : விவேக் (கொஞ்சம் தொப்பை வேண்டும்)
அனிருத்தப்பிரம்மராயர் : கமல்ஹாசன்(சாரி அருள் மொழி வர்மனாக உங்களை என்னால் பாவிக்க முடியவில்லை)

சேந்தன் அமுதன் : சித்தார்த்
பூங்குழலி : ஸ்நேஹா
வைத்தியர் மகன் பினாகபாணி அல்லது ரவிதாசன் : ஜே.கே ரித்தீஷ் :-)

கமல் சார், மணிரத்னம் சார், ஷங்கர் சார், ப்ளீஸ் சார்.....

டிஸ்கி:

இதையே மெகா சீரியலாக யாரோ எடுக்க முயற்சிக்கிறார்கள் என்று கேள்விப்பட்டேன். அப்படி ஏதாவது பண்ணி இந்தக் காவியத்துக்கு களங்கம் ஏற்படுத்திடாதீங்கப்பா

பொன்னியின் செல்வன் எனப்பெயரிட்டு சில வருடங்களுக்கு முன் வந்த தமிழ்ப் படம், நல்ல வேளை கல்கியின் கதையை படமாக எடுக்க வில்லை.